Sepp boarisch, Zeichnung: Heinz Kobald
Warum dass i jedz auf Boarisch schreibn tua? Ja mei.
Des Schriftdeitsche is ja a Kunstsprach, sozusagen a künstliche und da damid kommt ma vui zleicht ins Streidn nei. Si is aso hart und ungmiatli, weis hoit künstlich is, und des merkt ma.
Wann ma dene da drobn zuahört oda nacha lesn tuat was gsagt ham, nacha kommt alls aso hoibat oda vadraaht daher.
Gscheid redn kon koana mehr.
Des Boarische aba is echt und ned foisch.
Außadem is ned hart und ungmiatli, sondan ganz und gar menschnfreindli.
Ma wui doch koam weh doa! Oda?
Warum s nachat in Bayan oftmois aa ned andas zuageht wia auf Berlin?
Ja, weis hoit aa nimma Boarisch redn kenna im Maximilianeum.
Gred muaß wern, ned aso wia de Angie, de wo glei gar nix mehr sagt.
Aba, a Wunda is des koans.
Is sie doch da dortn groß worn, wos viazg Jahr lang nix ham sagn derfa.
Da lernt mas ned, des Richtige zua richtign Zeit sagn.
Da traust di oafach ned und jedz wo s Kanzlarin is, wo s de Kompetenz hätt, des Richtige zum sang, da kon ses ned. Weis moant, si taats Foische sagn. Kannt scho sei!
Und was hatsn scho ois Physikarin redn miassn?
Oa Reagenzglas ins andane neischüttn, wos soisd da dabei scho redn, mit wem aa?
Dees hättns aba alle aa scho friara wissn kenna.
Deszweng war ja aa da Gerhard aso narrisch, wiara seng hat miassn, dass sie eam aso nah auf de Hackn kemma is.
Eigentlich hat ja de Angie selba nix dafia do.
Dortmois, wia da Helmut sei Spendngsetz gmacht hat - und sei Mei ned auf, woher dass des ganze Geld kemma is, wei as dene vasprocha hat, das a nixn ned sang taat, aa wanna dafia dann sein Amtseid aa vagessn taat - da ham se alle druggt, wias zum Auframma in da Bardei ganga is.
De Angie hats macha miassn, aba si hat dann aa koam bsondas weh toa kenna.
Aso is si hoit nacha nauf kemma.
Aba dass sie glei Kanzlarin hat wern miassn, dees hätts aa ned braucht, wann se a paar andane ned scho wieda vadruggt hättn.
Zum Boarischn bin i wieda kemma wiari lesn hab miassn, daß de Charlotte vo uns bei da Angie in Berlin war, wei sie de Heidi aso aufgregt.
Aba i hab hernach nix lesn kenna, was gred worn is.
De Angie hat wieda nix gsagt.
Und koa Redaktion hat des auf Schriftdeitsch ned drucka kenna.
Habe di Ehre !
Chaim Wichtlmann
9 Elul 5766 * 2. September © Heinz Kobald
Wems was huift:
Da gaabats vo Langenscheidt a "Lilliput Bairisch".
A weng andas is de Schreibweis da drinn dann scho, aba was sois.
"Rund 5.000 Stichwörter und Wendungen.
Amüsant und originell - für Urlauber und Freunde des Bairischen."
Aso sagts da Langenscheidt. Kostn tuats 2,95 €.