Was de Charlotte grad hat, wann de Heidi de Streibombn im Libanon vo da UNO untasuacha lassn wui?
Dadazua deaf si doch gar ned dagegn sei zwengs unsam Grundgesetz und dem Vöikarecht, wo mia beachtn miassn.

De Angie tuats ja ned, und dees woaß de Charlotte.
Aba was hats da damit scho gwonna?
Wann se de Angie ned traut, sondan grad auf Distanz geht.
Und da Heidi ned dreiredn tuat. Des kannts aa gar ned.
Wei scho andane de Streibombn gfundn ham.
Und - weis oiwei no de Kinda de Haxn und de Händ wegreissn.

Ibahaupts hat doch da Halutz gsagt, dassa auf de Hizbullah ganz gezielt schiassn taat.
Was dean nacha da de Streibombn?
Aussadem had se da Olmert doch oiwei beschwert, dass de Hizbullah oiwei vo dortn ihre Raketn abschiassn taat wo ganz normale Libanesn ihre Wohnunga ham.
Da deaf er doch dann ganz gwiss ned oafach Streibombn auf de Häisa naufwerfa, grad wei er ned genau sigt, wo se de Kämpfa vo da Hizbullah vasteckan.

Dawischn mecht a de Hizbullah aba scho, grad mit dea gezieltn Schiassarei taat a s hoit ned treffa kenna.
Aa wann de Streibombn jedz no ned vabotn san.
Aba gega andane Menschn ois wia auf d Soidatn deaf a s hoit na doch ned werfa.
Wei sie san sozusagen doch so was wia MVM, oiso Massn-Vanichtungs-Mittl, de wo ma im Kriag gega mehra Soidatn eisetzn mechat. Wei i gega so vui Soidatn auf amoi mit da gezieltn Schiassarei hoit nixn ausrichtn ko. Wei oa Soidat mit oam Gwaahr hoit ned so oft schiassn kon wiara treffa mechat.

Und dann no de zwoa Sprecha, da oane vom Zentralen Rat, dea vazapft uns, was de Angie zua eam gsagt hat.
Und da anda, der wo dees sagn soi, wo de Angie zum Graumann gsagt hat, da davo sagt a nixn ned, aba er sagt, daß de Heidi gar koa Antisemitin ned sei kon.

Und de Angie? De sagt wieda amoi gar nix.

Da miassat ma amoi beim BundesVafassungsGricht nachfragn, obs fia de Befolgung vo dem Vöikarecht no an bolidischn Spuiraum gebn taat.
I moan ned. Wei da davo aa nixn ned drin steht.

Aba si teans grad aso ois wia wann dass oan hättn.

A Baya hat doch gegas Grundgesetz nix, wann eam dees grad sein Freistaat garantiert und deszweng stengan mia aa hintam Vöikarecht.

Da sigsd wia a Nachbarschaft oft gar nix macha kon, wann oana ned wui, wei a ned mag.

Dawei kammat de Charlotte aus Minga, wos ihr riesigs Kulturzentrum glei nebas Musäum auf am oidn mittlaltalichn Grund mittn nei baun deaf.
Wann dea Pladz nimma frei gwen waar, nacha hättns an Karstadt hintam Künstlahaus obreissn miassn, wei da dortn de große Synagoge gstandn is, de wo da braune Ade nimma hat seng kenna.

So konservativ samma mia in Bayan!

Chaim Wichtlmann

9 Elul 5766 * 2. September © Heinz Kobald

Wems was huift:

Da gaabats vo Langenscheidt a "Lilliput Bairisch".
A weng andas is de Schreibweis da drinn dann scho, aba was sois.
"Rund 5.000 Stichwörter und Wendungen.
Amüsant und originell - für Urlauber und Freunde des Bairischen."
Aso sagts da Langenscheidt. Kostn tuats 2,95 €.