Der unerträgliche Standpunkt

Heinz Kobald

  
 
Startseite / Boarisch gsagt / wia 2015 ogfangt hot
des mechsd ned glaam
Vom Zuaschaung gnua
Vom Zuaschaung gnua

Scho lang hat
des neie Jahr ogfanga
Mia daats vom zuaschaung
ja scho glanga

Da IS kriagt vo de
abgschlagna Köpf ned gnua
In Ägyptn kriagt
de Demokratie koa Ruah

Des Israel werd oiwei mehra
zua Schein-Demokratie
und macht de Palästinensa
des ganze Land hi

De Christn in Europa
ham Angst vorm Islam
Weis an ihrn Gott
koan Glaubn ned ham

Da Papst schimpft auf
sei Kurie
Wer sei Muatta beleidigt
dem glangt a oane hi

Da Putin hoit si
nach da Krim de Ukraine
As TTIP druckt mit
seine Investorn
unsan Rechtsstaat eine

Wosd hischaugst gibts
koa Ordnung nimma
Da Charlie kennt aa
koane Grenzn nimma

De Pressefreiheit
erlaubat eam an jedn Hohn
Er verspottet jedn Gott
und sei Religion
und da Houellebecq
schreibt an Roman davon

Und wia i so hischaug
Da sig is laffa
Wia Millionen dann
den Schmarrn aa no kaffan

De Hellenen woin
koan Euro zruckzoin
Mia soin uns unsa Geld
wo andas hoin

Dadzua schreins Deflation
Es gaab koa Geld
nirgads zum hoin
Und wer was Gsparts hat
der werd schaung
wias eam den letztn Penny raubn

Dabei gaabats
ganz wenige Leit
dene ghärat vo da Erdn
de ganze Hälftn scho heit

As Meer werd wärma
De Koralln wern blass
Da Wal frisst as Krill
zsamtn Plastikfass

Mia ham dann an Fisch
zsamtn Plastik aufn Della
So entsorgn mia den Kreislauf
und des oiwei schnella

Und nebadro ham Millionen
nix zum essn
Doch mia fliang zum Mars
ham de Menschn vagessn

In Minga werd
de Philharmonie entkernt
dass mas vo außn no dakennt
Doch innen drin
soid a Wunda gscheng
da daat ma de Musi
wieda ganz schee hörn

Ja so schaugts aus
im Paradies
Waar des da Schöpfungsplan
Is des so gwiss

Da Mensch derfat doa
grad was a wui
Er ibasigt
Es gibt Regln fia des Gspui

De Menschn wern aa
in dem Jahr no ned gscheid
Si ham ja no
Millionen Jahr Zeit



2. Februar 2015 © Heinz Kobald