De Sucht, de wo ois wieda kaputt macht

So lang bleibn, bis des was des Guade war, aa wieda kaputt gmacht is.

Zledzt hasd ja scho ganz grosse Brockan iba deim Kopf obgschlagn. De san ned vo alloa auf di nauf gfoin.
Kanzla ned - Supa-Minista ned - fia Europa aa koa Vaantwortung ned habn woin. Ja was nacha?
Und dann doch da hocka bleibn, wosd scho de ganze Zeit so fest opappt bisd.

Und jedz kosdas mit de Fraun aa ned ? Ja, Edi, was isn grad los ?
Moansd, dass du mit da Pauli jezad zrecht kummst ?

Wann oana nauf wui, aba dann vo da Loata runta foit, dea kon si sei Gnack brecha.
Dees aba, waar jedz nix Neis ned.

Oiwei des selbe ! Ned geh meng !
Warum is nacha de Macht in da Bolidig so was, des süchtig macht ?
Dass a "sechzähn jähriga" Bolidig-Lehrling dann doch bis zur Kanzlarin naufkummt?
An Süchtign aba konsd grad heiln, wannsd eam de Droge oafach wegnimmst.

Hosd mi ? Edi ? Du muaßt auf Entzug - vo da Macht, sonst dabräslts di no ganz - wuist du dees aso ?
An deine Freind denkst dabei gar ned, wei de kennan dann aa nimma aso doa ois wia wanns in dia no an Freind hättn, dea wo no ganz richtig im Kopf waar.

Dass jedz de Macht aso sichti macha kon - grad aso wias Raucha ?
Oda de Alohokrankn, de wo dann de Weißn Meis seng, de wo gar ned da san.

Und was is nacha mit da Demokratie ibahaupts?
Ham den de da drobn im Landtag iba da Isar den Auftrag zum Regiern ned vo uns, dem Bürger ?
Und wann vo dene iba 60 Prozent sagn, geh weida Edi geh, und gib a Ruah, nacha kennan de im Landtag se ned de Ohrn so oafach zuahoitn. Kenna deans scho - aba was kummt nacha ?

Und wanns jedzat scho streidn miassn, obs du bleibst oda geh soidst !

Moansd, dass da dees guat tuat ? Aba ganz gwiß ned !
Wei wanns scho aso weid is, nacha is bessa, du waarst scho vorher ganga, bis dassd wartst, was bei dera Redarei nauskummt.
Dees oane aba muaßt wissn, dass vui vo dene, de wo da jedz no zuaredn, gar nimma so ehrlich sei kennan.

2010 ? Was is nacha ?

Schaug da an Söda oo.
Dea is no jung, und dea mecht ganz gwiß ned, dassd du midreißt, dea mecht no was wern.
Warum konst du ned aso zu uns sei, wia dei Birochef zu dia war?
Dea is ganga, zwengs deina ! Wei er dia was Guats doa woit.
Gsagt hada, du hast nixn ned gwußt, dass er rausbringa woit, ob jedz de Haar vo da Pauli in echt so rot san wias auf de Foto herschaugn. Dadfia geht er jedz zu ihr und entschuidigt si.

Oiso nacha, Edi, was is? Mogst di du ned aa vo da bessan Seitn oschaugn lassn ?

Chaim Wichtlmann

10. Januar 2007 © Heinz Kobald

_______________________________________________

FAZ, 07. Januar 2007
Diskussion über Stoibers Zukunft - "Ein gewisser Abnutzungseffekt"
Wechsel ohne Brüche - wann ist Stoibers "Zeitpunkt X "?

ZEIT online, Tagesspiegel, 06.01.2007, 18:27
CSU: Stoiber bietet Pauli Gespräch an
Pauli bekräftigte ihre Forderung nach einem Rückzug Stoibers von der CSU-Parteispitze.