Mei, an richtign Nama fia an Jaga hätt a ja; da Schnappauf.
Passat scho. - Aba midm Jagan und bsondas midm Treffa - da hat a s hoit gar ned.
Und dass a an jedm Schnitzl nachjagt, des valangt ja aa koana vo eahm. Aba wann da Fleischberg no grässa is, nacha kannt an scho vui leichta findn und sei Nasn hihebn.

Vasteh kon i eahm scho, wann a liaba a Frischfleisch jagt ois wia des oide Gammlfleisch fia den Döna.
A so a Bär gibt hoit scho was her.
Wer hadn den eigentli aufgfressn? Da davo hab i fei nixn nimma ghört.
Grad wieda a foisch Buidl vom Bruno hättns gfundn. - A mei.

Villaicht war ja ois aa grad a ganz a odraahte Absicht. - Döna !
Brauch ma ned in Bayan.
Mia ham de Weißwirscht, des Gsöichte und an Schweinshaxn.
Mid dene Sachan da aus dem Vordaren Orient, da werd de Boarische Kich fei ganz schee an d Wand hidruckt. Wer mogn des scho?
Mit da Pizza hat des alls a scho ogfangt. Soids jedz so weidageh?

Oiso, da passt des ganz guat nauf auf s Kraut, dass des Gamml-Döna scho arg vagammlt war.
Oiso nimma zum Essn.
Aba mei, manche ham hoit doch no den oidn Trieb, dass ma nixn, was no zum Essn waar in Abfoi neiwirft. Dees waar ja a Sind.
Herschenga ham s des aa ned guat kenna, des waar ganz gwiss aufgfoin.

Tonnenweise ham s des Döna da ghabt. Villaicht hams gmoant, dass no mehra Zuawandara kemman.
Aba dee sann dann doch ausblibn. Nacha hat aus dem Gschäft nixn mehr wern kenna.
Und auf da Wiesn is aa ned aso vui Döna gessn worn.

Des Mißtraun gega Berlin is hoit scho arg groß.
Ois, was vo de Wichtigmacha do drobn kommt, werd hoit aa ned aso ernst gnomma.
De ham hoit aa scho so a ausgeprägte Fantasie, de wo mia in Bayan ned aso ham.

Und außadem, mia ham hoit aa no des gsunde christliche Vatraun in unsane Mitmenschn.
Ja, wo kammatsdn do hi, wannsd in am jedn Menschn scho glei an Baadzi seng taatsd, dea wo di grad ummiziang wui.

Aa, wann da Bulle vo Töiz oda de Cops vo Rosnheim alle Vabrecha aufmischn.
Villaicht hättn de zwoa Mannschaftn a guade "Task Force" abgebn.
Wo i gar ned woaß, warum da eisnharte Werna de Gamml-Schniffla hat Task Force nenna miassn.
De Manna ham wahrscheints mit dem Nama aa scho gar nixn ned ofanga kenna.

No oa Schwierigkeit hat s da gebn.
Des vagammide Fleisch is hoit aa ned rumglaffa, sondan is in de Tiefkühlboxn rumghängt und hat se ned griaht. Wia soisd nacha sowas eifanga, was se ganz staad hebt.

Oda, da woaß i no ganz saubane Schnitzljäga. De aus England. - Warum jedz de?
Ja, wei s eahna in England des Jagn nach dene Fuchsn vabotn ham. Da kanntn s dann bei uns de dafeitn Schnitzl dajagn. De taatn s scho findn. De Hund ham a guade Nasn.
So a oida Fuchsn riacht fei aa ganz streng.

Weidmanns Heil ! Gewitterdonnerkeil !

Chaim Wichtlmann

13 Elul 5766 * 6. September 2006 © Heinz Kobald

Wems was huift:

Da gaabats vo Langenscheidt a "Lilliput Bairisch".
A weng andas is de Schreibweis da drinn dann scho, aba was sois.
"Rund 5.000 Stichwörter und Wendungen.
Amüsant und originell - für Urlauber und Freunde des Bairischen."
Aso sagts da Langenscheidt. Kostn tuats 2,95 €.