De Zeit is voi
Es is so weit
Doch i wer
jeds Jahr nia ned gscheid
Jeds Jahr is Weihnachtn
und dann
fangans zum schiassn
wieda an

Warum woin de
koan Friedn ned
Was soi des gscheide
valogene Gred
Fias Waffnbaun
hams oiwei Geld

Doch so vui Menschn
auf da Welt
ham nia zum Essn
gar koa Geld
Und dees was sie
zum Essn hättn
aus dem machans
an Bio-Sprit +

Vastehs wer wui
So hat des Weihnachtn
koa Zui
Den Friedn bringat
de Geburt
Doch sie treibn
den Friedn furt -

Dee wo regiern !
Zum Woi fia wen
De sidzn an
ihrm Disch bequem
und kanntn nix
davo hergebn

An Weihnachtn
Halleluja singa
Dees kon da Welt
koan Friedn ned bringa

Dafia muass ma
scho mehra doa
Doch jeda sagt
Er waar alloa

Dees iss was alle
eiredn woin
Dass Weihnachtn
grad singa soin

Wann Weihnachtn
Oimoi ernst wern taat
Dassd Welt
Wirkli ihrn Friedn hat

© 2008 Heinz Kobald